Baka Sakali 2 – Kabanata 8

Kabanata 8

Surpresa

Mabagal mag maneho si Brandon.

“Bagal naman.” Parinig nung lalaking model.

Tumawa si Brandon, “Kasalanan ko ba kung natutuwa akong bagalan ‘to?”

Umiling ako. Wrong! Hindi siya mabagal mag maneho. Talagang sinasadya niyang bagalan ito.

Sumusulyap-sulyap pa siya sakin tuwing nag-oovertake siya. Nagpapasikat. Tumingin na lang ako sa labas para di ko na mapansin ang pagsulyap niya.

“Matagal na ba kayo ng boyfriend mo?” Binasag niya ang katahimikan.

Umubo yung lalaki sa likuran at humalakhak.

Hindi ko siya sinagot.

“Hmmm. Hindi naman siguro yun importante. Yung mga mag-asawa nga naghihiwalay din.”

Pinaglaruan ko yung singsing na binigay ni Jacob sakin noon. Napuna niya agad kaya yun naman ang pinagdiskitahan niya.

“Engaged na kayo?” Tanong niya.

Liningon ko siya at sinimangutan.

“I’m just asking. What’s wrong with that?” Tumawa siya nang nakita ang pagsimangot ko.

“Mag drive ka na lang.” Sabi nung isang babae na tumatawa na rin.

Nang nakarating na kami sa Imperial Bay, nabigla ako dahil kakapark niya pa lang ay lumabas na siya agad sa sasakyan niya at umikot.

Akala ko nagmadali siyang pumasok sa loob ng resort, yun pala, pinagbuksan ako ng pinto. Napaawang ang bibig ko habang naglahad siya ng kamay at nakangisi.

Kumunot ang noo ko at umiling.

“No, Thanks. Kaya ko mag isa.” Sabi ko at bumaba ng mag isa.

Ngumuso siya habang tinitignan akong naglakad palayo sa sasakyan niya. Humalukipkip ako at inayos ang buhok kong mejo may bakas pa ng hairspray sa modeling. Gusto ko tuloy maligo.

“Hi! Ba’t ang tagal niyo?” Bati ni Kira samin.

Kasama niya si Ms. Bubbles at ilang models.

“Nandoon na sila sa loob. Nagkaroon ng maliit na program. Bilisan niyo na! I also have rooms for you. Ibigay niyo na lang sa sa reception yung bags na dala niyo.” Sabi ni Ms. Bubbles.

“Oh, Rosie? Yan lang dala mo? Di ka ba mag s-stay?” Tanong ni Kira.

Umiling ako, “Di eh.”

“Bakit?”

“Hindi yata papayagan ng boyfriend. Tsss. Walang tiwala? Possessive?” Singit ni Brandon.

Napapikit ako sa inis. Gusto ko na naman siyang pektusan.

“Uhmm. Basta… Kailangan kong umuwi.” Sabi ko at naglakad palayo para maiwasan na si Brandon.

“Halina kayo!” Sabi ni Kira sa kanila.

Nakarating na kami sa function room. Glamorosa. Naka beach attire ang mga tao. Yung tipong pinapaalala sakin na models ang kasama ko. After party. Yung iba naka maxi dress, yung iba naka bikini. Ako naka shorts at cropped shirt lang. Hindi ko alam kung bagay ba ako dito. May red carpet pa.

Biglang may humila saking di ko kilala.

“Rosie! Picture tayo!” Anila.

Wala akong nagawa kasi agad nila akong pinalibutan. Ngumisi na lang ako sa maraming camera. Patay! Magmumukha akong out of place dahil sa soot kong ito.

“Rosie, tayo naman!” Sigaw nung kabling grupo.

Halu-halo na ang pictures. May puro babae, may babae at lalaki, may puro lalaki… Hindi ko alam kung bakit sila nagpapapicture sakin. Ilang sandali ang nakalipas ay pumasok sina Jasmine, Brandon at yung dalawa pang models sa finale.

“BRANDOOON!” Sigaw ng mga babae at hinila siya para makapagpapicture.

Hinila din si Jasmine ng mga lalaki para makapagpapicture. Puro picture ang ginawa ng mga tao. Aalis na sana ako para humanap ng mauupuan pero may humila sa braso ko.

“Yung dalawang finale naman!” Sigaw ng mga babae.

Hindi na ako nakapiglas sa sobrang daming humila sakin. Halos madapa nga ako. Nabadtrip ako pero di ko magawang mag eskandalo! Nabunggo pa ako sa dibdib ni Brandon dahil sa lakas ng pagkakahila.

“Sh1t! Aray!” Sabi ko.

Napatingala ako sa kanya. Nakangisi siya habang tinitignan ako.

“Okay! Smileee!” Sigaw nung photographer.

Ngumisi na rin ako pero lumayo ako ng konti sa kanya. Hindi nadala ang mga kasama kong models, tinulak nila ako palapit sa kanya. Kumunot na ang noo ko at nag init na ang pisngi ko sa sobrang inis. Si Brandon naman, mukhang idinidiin pa lalo ang sarili niya sakin kaya wala akong nagagawa.

“Teka nga!” Sigaw ko at inayos ang sarili.

“Huh? Bakit?” Sabi nung katabi kong kanina pa ako tinutulak palapit kay Brandon.

“Pwede bang maayos na picture naman? Yung maayos ako.” Sabi ko at tumayo ng mabuti.

“Ahh. Okay!” Umayos din sila pero ganun parin, tinutulak parin ako palapit kay Brandon.

Kahit di pa naman talaga natatapos yung picture taking ay nagwalk-out na ako. Mga bwisit. Sabing ayoko eh. Mga plastik. Mukhang close sa pictures pero ang totoo, hindi sa totoong buhay. Umiling ako habang iniisip na ma uupload yun sa Facebook.

Tinext ko si Jacob:

Kainis mga tao dito. Puro picture inaatupag. Nagwalk out tuloy ako sa sobrang inis.

Nagreply siya agad:

Inaantok ako. Nang nakita kong may text ka nagising ang kaluluwa ko. Ilang oras na lang, Rosie… Makakalimutan mo rin yang inis mo.

Napangiti akos a reply niya.

Tinignan ko ang venue. Maganda dito. Akala ko enclosed space yung venue, yun pala, dagat na ang gilid. Open space pala. Ang ganda dito, sobra! Nakapunta na ako dito noon kasama sina Callix, Jacob at buong barkada pero ngayon ko lang napansing may venue na ganito pala dito.

Kalagitnaan na pala ng program ng dumating kami. May awards din palang nangyari.

“Finally! Yung pinakahihintay na awards! Best male and female model of the season! Kanina pa dapat ito binigay na award kaya lang di pa sila nakarating!”

Hindi pa sinasabi ni Kira yung nanalo, kinabahan na ako ng bongga! May feeling na kasi ako. Napayuko ako habang tinitignan ang sariling kamay.

“OMG!” Sigaw ni Jasmine sa malayo.

Nasa table ako kasama ni Kira. Iniwasan ko talaga yung table nina Brandon, eh. Nagkataon pang kasama sila ni Jasmine kaya eto ako at mag isa dahil si Kira ang nag host ng party.

“BEST MALE MODEL OF THE SEASON AWARD GOES TO: Brandon Rockwell!” Pasigaw na sinabi ni Kira.

Tumayo si Brandon at nakipaghighfive sa dinaanang mga models. Tumili ang mga kaibigan niyang models. May iilan pang sumulyap sakin habang tinatanggap ni Brandon yung award. May isang maliit na trophy at kailangan ding mag speech pag natanggap mo na yun.

“Siguro nanalo ako ngayon dahil inspired ako. That’s all. Thank you.” Kumindat siya sakin.

Umiling ako at tumingin sa malayo.

“Inspired? wooo! That’s new!” Sabi ni Kira habang kinakausap yung ibang models.

Pagkatapos ng chikahan nila ay naganap na ang kinakatakutan ko.

“THE BEST FEMALE MODEL OF THE SEASON AWARD GOES TO: Rosie Aranjuez!”

Ha-Ha-Ha! Ang saya ko naman! Tumili ang lahat pero nangibabaw ang nakakabinging sipol ni Brandon.

“That’s my girl!” Pahayag niya sa lahat.

“UYYYYYYYYYYYY!” Panunuya ng lahat habang umaakyat ako sa stage.

Ngumisi ako ng isang plastik na ngiti nang tinanggap ko ang trophy at humarap sa kanila.

“Salamat nito. Hindi ko ineexpect na mananalo ako kahit first time ko pa.” Sabi ko. “Yun lang.” Ngumisi ako at bababa na sana pero…

“BAKA NAMAN INSPIRED KA RIN?” Panira nung isang model na hindi ko kilala.

Hindi ako nagpatinag sa mga comments nila.

“ROSIE-BRANDON-ROSIE-BRANDON!” Nag-chant ang lahat nang naglakad ako pabalik ng table.

Mga walang hiya! Sabing ayoko, eh! Bwiset! Ayoko ring mag mura pero nababanas na talaga ako. Hindi ako makangiti ng kahit plastik na ngiti. Sumimangot pa lalo ako at umupo ng diretso sa upuan ko.

“ANG KJ naman ni ROSIE! Katuwaan lang naman!” Sabi nung isa.

“Oo nga, Rosie! WOOOOH!” Sigaw ni Jasmine.

“Ooyy! Wa’g kayong ganyan. Hayaan na natin siya. Ano ba kayo. Mahiya nga kayo.” Tumawa si Brandon sa kanila.

“WEEEH?”

“Oo. Hayaan niyo na siya?”

“Kayo na ba?” Sigaw nung isang model na di ko makita ang mukha.

Napatayo talaga ako para tignan kung sino yung nagtanong. HELLO, Bulag ka ba ineng? May boyfriend akong tao at si Jacob Buenaventura yun. Gusto mo ipabasa pa kita sa life story namin baka pagsisihan mong nagtanong ka pa?

Hindi ko mahanap yung sumigaw.

“No comment.” Ngumisi si Brandon.

“HINDI KAMI! Pwede ba!?” Umirap ako.

“WHOAAAA! Denial?!”

Nagtawanan ang lahat. BUUUUUUUUUUUUUUUUUUUUUULLLSHIIIT!

Buong araw yata akong badtrip. Nakalimutan ko pati yung gutom ko sa sobrang inis ko sa nangyari. Hindi na ako nakaadlib pa dahil masyado silang maraming hinaing. Kung sisigaw ako para sabihin yung gusto kong sabihin, hindi nila ako maririnig dahil sobrang ingay nila.

“Rosie! Swimming tayo!” Anyaya ni Jasmine ilang oras ang nakalipas.

Nasa table pa rin kasi ako. Umalis na si Kira para magcheck in sa suite na inilaan ni Ms. Bubbles para sa kanya. Ako lang ang natira dito sa venue. Kaharap naman ang dagat kaya magandang tambayan na rin.

“Hindi na.”

Pinasadahan niya ako ng tingin.

“Huh? Eh, naka two piece ka na? Ba’t ayaw mong mag swimming! Tara na! Kasama naman natin sina Brandon kaya kung di ka marunong lumangoy-“

Nainis naman ako sa sinabi niya kaya pinutol ko agad, “Di na. Kayo na lang. Salamat.” At nagkunwari akong may katext.

Di bale na nga lang kung tingin nila ay maarte ar suplada ako. Nagkibit-balikat si Jasmine at naglakad na lang palayo papuntang dagat.

Ang sexy niya talaga. Ang ganda ng katawan. Ganun din kaya ang katawan ko pag tinitignan ng ibang tao? Nakakainsecure naman.

“Rosie, swimming na tayo!” Marami pang nagyaya sakin pero umiling na lang ako.

Mga waiter na lang ang kasama ko dito. Nagliligpit sila ng mga tira-tirang pagkain.

Kitang-kita ko ang mga models na panay na naman ang picture taking sa sea shore. Wala akong pakealam. Ang alam ko na lang ngayon ay panatag ang loob ko dahil papunta na daw si Jacob dito. Ilang minuto na lang ay makakarating na siguro siya.

Hindi ako nagkamali. Napangiti ako nang nakita ko siyang umakyat sa stage. May microphone kasi doon. Napatayo-upo ako sa nakita ko. Hindi ko inakalang agad siyang pupunta sa stage nang di dumadaan sakin. Hindi ko mapigilan ang ngiti at excitement ko.

“Surprise!” Malambing niyang sinabi sa microphone.

Nag init agad ang puso ko. Ito ang pambawi niya sakin. Dahil hindi siya nakapunta sa fashion show, babawi siya sa ganitong paraan?

May sinabi siya sa sa mga bandang dala niya. Mukhang banda yun dito sa Imperial Bay. Uminit ang pisngi ko at narealize kung anong gagawin niya. Mahilig talaga siya sa musika kaya alam kong miss na miss niya nang kumanta. Pero kumirot ang puso ko nang nagsimula na siya sa pagkanta… lalong lalo na nung narinig ko ang lyrics niya. Diretso ang tingin niya sakin habang kinakanta ang bawat salita.

“I was young but I wasn’t naive. I watched helpless as you turned around to leave. And still I have the pain I have to carry. A past so deep that even you could not bury if you tried…”

Ngumisi siya. Tumindig ang balahibo ko. Wala akong nagawa kundi magtakip ng bibig at magpigil ng luha. Kinukurot ang puso ko dahil sa lyrics.

“After all this time, I never thought we’d be here, Never thought we’d be here. When my love for you is blind but I couldn’t make you see it, Couldn’t make you see it… That I loved you more than you’ll ever know… When part of me died when I let you go…”

Hindi ko na napigilan ang pagdanak ng luha ko. Naalala ko lahat ng pinagdaanan namin noon. Lahat ng nangyari, lahat ng sakitan namin, lahat lahat naalala ko. Lumakas at bumilis ang pintig ng puso ko nang kinakanta niya yun.

Hindi ko na siya makita ng maayos dahil sa mga luha ko. Panay na lang ang punas at hikbi ko.

“Ba’t ka umiiyak? Masaya naman ang kantang ‘to? At mahal na mahal naman kita… Hindi na ulit mangyayari yun.” Ngumisi siya at iniwan ang stage para daluhan ako.

“Oh MY GOOOOOD! ANG GANDA NG BOSES NIYAAAAA! GWAPO PAAA!” Nagsitilian ang mga modelong nasa likuran at nanonood pala.


One thought on “Baka Sakali 2 – Kabanata 8

Leave a Reply

This site uses Akismet to reduce spam. Learn how your comment data is processed.

You cannot copy content of this page
%d bloggers like this: